KUU PUA LEI AHIHI

Hanohano kuu Pua Lei Ahihi
Ua onaona i ke ano ahiahi
Moani ke ala i ke awakea
Lei kaomi kehau o ka uka iu
Eia mai au Lokeiliahi
I kui pu ia me ko aloha
Aloha ia home ku kilakila
Lohia i ka malu lau alani
O ke ani peahi me he ipo ala
Haupu ae au o oe ia
Alia oe e pulale mai
A iliwai like ko’u manao
Paaia ke aloha i ko Puuwai
A kau i ka hono o na kuahiwi
A ike oe ia’u i ka pae opua
Loaa ko lei anuenue
Ua like me ka onohi o ka la
Opuu pua i Halaaniani
Haina ka puana i loheia
Ke Ala Iliahi e moani nei

G. K. P.

[This mele was probably composed by Gulstan K. Poepoe, the owner and editor of the Holomua.]

(Holomua, 6/20/1914, p. 8)

Ka Holomua, Buke I, Helu 40, Aoao 8. Iune 20, 1914.