[Found under: “HE LONO ANO NUI.”]

Maluakiiwai ke aloha,
Hoopulu i ka liko Mamane,
Ke uleuleu nei na manu,
Inuwai lehua o Panaewa,
E walea ana i ke onaona
I ke one wali o Ohele,
Hele mai nei ko’u aloha,
A lalawe i ko’u nui kino,
I mea iho au e hihio
Hiki mai ana kou aloha
Huli ae au ma ka paia,
Hoonana i ka manao
He manao no ko’u e pili
Me ka nalu ha-i mai o Huia
Hui puuwai olu ke aloha
Na mi nei no ia pua
O ka iwa oe o ka hikina
E paihi manu o Waiola
E ola oe e ka Pahukapu
Milimili a ka pua Komela
No lihauanu ke aloha
Noenoe mai la i Olaa
A loaa wale no ka hoi
Ko huli pono mai ia nei
Pono oe pono pu kaua
Me na puuwai palupalu
Milimili a ka pua Komela.

(Oiaio, 4/19/1895, p. 3)

Ka Oiaio, Buke VII, Helu 7, Aoao 3. Aperila 19, 1895.