HE WEHI KEIA NO LIHAU PUA.

1.—He pua nani oe i poniia,
I kila paaia me ka makua mana loa,
I lei i wehi no kuu kino,
A he hiwahiwa hoi na kuu aloha.

Hui.

He nani wale o Home Lihau pua,
I ka holu nape mai a ka lau o ka niu,
Ilaila i hoohihi ai ka manao,
I kuu home aloha i ka wehi o na pua.

2.—Onaona wale hoi pua Pikake,
He moani aala ke hiki mai,
He ala huihui ke honi aku,
A he mea mau ia no Lihau pua.

3.—He u’i he nani wale o Home Lihau pua,
I walea i ka olu a Home Lihau pua,
I ke kaomi malie a ke kehau,
Ilaila maua ike iho ai,
Ka owe hone mai a ka leo o ke kai.

4.—Nawai e ole ko’u hoohihi,
A he pua mai oe no ka wekiu,
Ua kinikohu ia kou aloha,
I lei hooheno no kuu kino.

5.—He aloha e ka leo o kuu aloha,
I ka pane ana mai me ka nahenahe,
E nonoi nui aku i ke Akua,
Aia ilaila kou palekana.

6.—Kau aku ka manao no ka nu hauoli,
Ka makua mana loa ko’u kokua ia,
Ka hokuloa hoi ko’u kiai mau,
A puka i ka ao malamalama.

7.—Haina ka puana i loheia mai,
No Lihau pua keia hooheno,
Ua hilo paa ia ko’u aloha,
I kuu home aloha i ka wehi o na pua.

Hakuia e Mrs. Kaehanui,

Kalaupapa, Molokai, Ianuari 21, 1914.

[Does anyone know where Home Lihau Pua is? Might it be someone’s home in Kalaupapa itself, or a home that Mrs. Kaehanui left to go to Kalaupapa?]

(Kuokoa, 2/13/1914, p. 5)

Ka Nupepa Kuokoa, Buke LII, Helu 7, Aoao 5. Feberuari 13, 1914.