KE ALOHA ONIPAA.

Hakuia e Mrs. Pikini Young Hee.

1

Onaona aala ia’u ka nua lehua o Puna,
Maholehole ia pua i ka pehia ia e ka noe,
Ike i ka ili e mahelo o ka panini i ka wai,
Ua hele a Upoluhiwa i ka puia i ke onaona.

Cho. Aia ilaila ka haili hiehie a ka manao,
Repeat. E manao aku ana hoi a he ole ka maliu mai.

2

Anoano aloha ia’u ke ano aloha i kuu ipo,
I hoa kuilima oe no kuu mea huna i ka wao,
He makana na’u ia oe, kanaenae i Waialoha,
I huhuli hinalua i ke oho o ke kalukalu.

Cho. Aia ilaila, &c.

3

Aole no mea like me ka iki noeau o Kina,
I lohia mai na hena laula o na kuahiwi,
Ike i ka kano aunaki i na puna ume a ka mikioi,
Oia ai haaheo i ke ka owali ia e ke akamai.

Cho. Aia ilaila, &c.

4

Kaua pu ilaila i ke anu a ke kehau,
Ahe lau koa e ka hale i malu ai ke aloha,
Kii honehone i ke kula waliwali ohaha i ka noe,
Nui iho la ka hanu o ke aloha i ka nuu i ka hala ai a ke Kinau.

Cho. Aia ilaila, &c.

Owau no me ke aloha
Mrs. Pikini Young Hee
Wailuku,
Maui

(Ko Hawaii Pae Aina, 5/27/1882, p. 4)

Ko Hawaii Paeaina, Buke V, Helu 21, Aoao 4. Mei 27, 1882.