KUU PUA MELIA KE ALOHA
Auhea wale oe e pua Melia,
Pilia ke ala me ke onaona.
Onaona ko maka e leialoha,
Ua pulu i ka wai lohi o Maleka.
Ma ka leta kuu ike ana iho,
Kapalili i ko’u puuwai.
He waiwai paa oe na’u,
Hoa pili mau no kuu kino.
Kuu kino kai alo i ke anu,
Konokono ae a ke aloha.
Me oe ke aloha pili paa,
Me a’u ka iini mau loa.
Noho aku nei au o ke ehuehu,
Noho mai nei oe o ke ehukai.
Kai no ua lawa ko makemake,
Ka uwea umii makeneki.
Nana i umii Lomelane,
Lai ai na pua i ke aniani.
Aniani na hana i ka Nautilo,
Kakia kuinao a ke akamai.
O oe ka oi i ko’u manao,
Kiekie i ka helu ekahi.
Akahi ke aloha e pipii nei,
Ua like me ka wai mapunapuna.
Hookahi a’u mea uluhua,
Ka hauwalaau a na manu.
Mea ole wale no ia leo,
Ke manao ae au ia oe.
O oe kuu lei onaona,
Lei hoohie a o nei kino.
“Haina mai ana ka puana,
Kuu hoa alo kehau anu.”
M. D. M. & L. S. N.
(Kuokoa, 3/26/1887, p. 1)
Ka Nupepa Kuokoa, Buke XXVI, Helu 13, Aoao 1. Maraki 26, 1887.
