LIKO AMA-U.

HE aloha kuu lei liko ama-u,
I nohea i ka ua kilikilihune,
O ka pa mai a ka Malualua,
Halihali ae ana i ka uhiwai!
Owai e ke hoa like aku ai,
Me ka hau kololio o ke kuahiwi;
Ke pa mai nei anu hu’ihu’i.
Lokuloku ana i ka welelaulima,
Elima mahina ia Kaiwiki,
I ka maluhale a o hone ke aloha,
Ia aloha i ka pua o ka awapuhi,
Ke ala hu’ihu’i waianuhea,
Lihau i ka uka lae laau;
Aole no au a e hopo ana,
Ke noho i ka uka la o Kaiwiki.
He ai ulu wale ko ka nahele,
Oopu inuwai o Kamaili;
Opae kalaole noho kuahiwi,
Nanao ai lima o Honolii.
Liilii ia hana i kuu manao,
I ka lanakoi ae a ka makemake,
Makemake no au a e huli hoi,
A e ike i ka home o kuu aloha,
Haina ia mai ana ka puana,
Nani wale Kaiwiki kau mai iluna.

S. A. S. MIKA.

(Kuokoa, 2/4/1921, p. 3)

Ka Nupepa Kuokoa, Buke LIX, Helu 5, Aoao 3. Feberuari 4, 1921.