A name song for “eagle eye” William H. Sheldon, 1863.

He Inoa no Willie H. Kelekona.

Eo e ke kama Uilama,
A Hoolei no he makua,
Ano wale mai no ke aloha,
I ka pua o ka lama i ka uka,
Kaua no hoi ke noho,
I ka hau oki o ka mauna,
Mai mauna oe i kuu lei,
I kui ia e Hiku i ka nahele,
Noho mai Poliahu i ka ihi,
Kipu paa mai i ka noe,
Ke nihi ae la i na pali,
I ka uka o ke ahi Alaka,
Laka mai no oe i pulima,
Komo ai hoi o ka punuku.

Eo e ke kama Uilama,
A ka Maiwela no he makua,
Kau wale mai no ka halia,
I ka pua hinahina i ke kula,
I nohea i ka la o Malama,
Kahu mala pono oi ala,
Ahea la oe hea mai,
A-o-oe a o wau kai ona,
I ka nua o ke oho o ka manu,
I ka hale malu a ke mau,
Amau mai nowelo mai,
He makau he weliweli i ka leo.

Eo e ke kama Uilama,
Ke Pooloku no he makua,
Akahi ka wela o ka manao,
I ke ahi a mai i ka uka,
Ke haa mai la i Hanalei,
Kuahiwi haaheo i ka makani,
Ka nahele paoa i ke ala,
E kii ka wai i mapuna,
Wai koo lihilihi a ka manu,
Iwalea i ka ono o ka lehua,
Ka lehua ku pali i Keaau.

Eo e ke kama Uilama,
O Kaukaai no he makua,
Akahi ka lana o ka manao,
I ka pua hiwahiwa ke ulu,
I ka ulu lehua a Hiku,
I ku iluna o Kaukolo,
Ke kolo ae nei e ka ohu,
Ke nihi ae nei e komo,
E komo i ka poli o ke hoa,
Akahi ka lele o ka hauli,
I ka manu leo nui o uka,
E hea ae ana e ua,
E huli e ke kama e hoi,
O pulu i ka wai koekoe.

Eo e ke kama Uilama,
O Kealailani he makua,
Noe wale mai no na pali,
I ka hale naulu i ke kai,
Akahi ka manao i puka ae,
I iini ai hoi o loko,
E pue ai hoi i ke anu,
I ka hau anu hea i ke kula,
Puili koolau i ka nahele,
A he hele no ko’u me ia la,
Kai nei puliki a paa.

Eo e ke kama Uilama,
A ka Hululeimamo he makua,
Nani wale ka ikena ia Kona,
I ke kai au a ka makua,
Kuu ipo kuahine i Hopoe,
Hopo ole kuu kino i ka ua,
Kaua pu hoi elua,
I ka papa holu o Apuni,
Puni oe i ka wai apiki,
I ke kiko waena o ke kanaka,
O ka po pouli mehameha,
Olau i ke ao ili lani,
Kuu lei laha ole o ke kama,
O ka lihilihi rose o ka lani,
Pono ole ia pua ke ako,
I ka hauwalaau o ka manu,
He Kaupu holapu no kai,
Haukae aina o na’lii.

Eo e ke kama Uilama,
O Kawealani no he makua,
Kuu ipo i ka la o Mana,
I ka wai liula i ke kula,
Pono ole no wau ke noho,
I ka haoe a Limaloa,
Loa wale ka manao ke au,
A loaa i ka uka wehiwehi,
Ka awihi mai a ka lehua,
Elua maua i ka ino,
Ino mai ka leo o ka makua,
I ka hao ae a na manu.

Eo e ke kama Uilama,
O Kala no hoi he makua,
Aia ko’u hoa i ka ohu,
I ka ohu kiai kuahiwi,
A he hiwahiwa oe he hiapo,
Na ka la hiki ma Haehae,
Haehae wale ia e noho nei,
I ke kau mau a Kaopua,
Aohe hanini i ke Awaiki,
A he iki kuikele hana io,
Umii ia iho i paa,
I mahui no ka la pololi.

Eo e ke kama Uilama,
O Alapai no he makua,
No leo lani hale ke aloha,
I ke ku haaheo i ke kai,
Ka huai a ka lau o ke kou,
Ua kohu ka hakoi a loko,
Ua ulu welawela i ka manao,
He manao ua paa ilaila,
I ka liko wale o na pua,
Ke noho mai la i Hanalei,
I lei heenalu no ke kama,
I ka nalu hee o Kamakalau.

H. W. K.

[Willie H. Kelekona, is William H. Sheldon. H. W. K., the composer is most likely Mrs. Hannah W. Munn Sheldon, wife of Henry L. Sheldon.]

(Hoku o ka Pakipika, 3/26/1863, p. 4)

HOKP_3_26_1863_4.png

Ka Hoku o ka Pakipika, Buke II, Helu 24, Aoao 4. Maraki 26, 1863.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s