HE MELE HOOAEAE.

I aloha au i ka uka i ke onaona,
I ke kahuli mai o ka lau o ke kukui;
E kuhi ana au eia i kuu poli kuu lei loke,
Eia ka ua lilo i ka manu inuwai pua.
He manu punua ia na ka la i hanau mai,
Na ka ua no i hanai a nui i ka nahele;
Ua kino a manu he keiki na ka hau,
I lohe mai no au i ka alae kani leo le’a i ka wai;
Eia o Ewa la ua haunaele i ka makani moae,
Ua ohi wale ia ka i’a hamau leo o ka aina.
Inaina loko manawa ino i ka waikoloa,
I ka hehi ku mai no i ke kai la’i o Kuhia;
Kuhikuhi ke kai ma Puuloa ke ala,
Loaa koke aku no ia’u i ke kula o Kanehili;
Ua nonoke wale a luhi moe i ka ohai,
I ikeia aku no i ke kukui ahi a naulu i ke kula,
I uua ma ka puka makani a ka maluakele,
Waiho wale iho ke kino o ka manu o Kaiona,
O ka moe no a ke kula o ka waiho no  a Kamaomao,
o ka luna o Puuku’ua ka’u e aloha ae nei,
O ka mea nana i wehe ke kike pani o ko’u makemake.
He wahi aloha no ka ua liilii la o Manoa

Na KU o Manoa i haku.

(Kuokoa, 5/30/1919, p. 5)