HOOHENO NO KA INUWAI.

Auhea wale oe e ka Inuwai
Hoa hooipo hoi o ke kehau
Me he a la o kuu aloha kekahi
Pulu ana i ka ua Lihauanu
Ua anu hoi au a e noho nei
I mehana i ka wai wela o ke kini
Me neia oe noonoo mai
Ai hookoia ko makemake
E i ae ka makani a hiki mai
Aole hopo iho ko’u manao
Manao paa ko’u a hiki aku
A kau kaua i ka hanohano
O ke kau ae a ke ao i ka ipo lia
He halia he manao kai hiki mai
I alawa iho wau no Hulaia
Alo ana o Kalanipuu i ke kai
O ka noho nani mai a Niumalu
Hanohano i ke kai Nawiliwili
Ke hone a ke kai i ka pueone
Me he leo ala no kuu aloha

Haina ia mai ana ka puana
I mehana i ka wai o ke kini

Hakuia e,
S. M. a me Pansy.

(Leo o ka Lahui, 6/10/1895, p. 2)

Ka Leo o ka Lahui, Buke II, Helu 1226, Aoao 2. Iune 10, 1895.