Sweet mele aloha, 1919.

KUU PILI I KA UA NAULU.

Hooheno keia no kuu pili,
Kuu leimomi o ka ua naulu;
I ulu a kupu i ka la hiki,
A mohala i ke kai malino o Kona.
O Kona i Kailua ua kaulana,
O ke onehanau o kuu aloha;
No Kona ka opua kukilakila,
Hooipo i ka luna o Maunaloa.
He aloha na kuahiwi ekolu,
A Hawaii a e haaheo nei;
Haaheo ka opua i haliia mai,
Noho i ka luna a o Kaaliwai.
Ilaila hui kino me ka inuwai,
Ka makani aloha o kuu aina;
Aina Niihau i ka la weli,
E loku ia nei e ka ua naulu.
Hooulu ia e ke konalani,
A mohala i ka ua kualau;
Ua kini ua mano lau ke aloha,
I lei kahiko no kuu kino.
E lei no au i ke aloha,
Me a’u mau lei ponimoi;
O oe kuu lei a i poniia,
A kau ka inoa M. W. K.
Hoohihi ka manao me ka makemake,
Ina uluhua noho i ka hapapa;
He aloha Kamalino i ka ehukai,
I ka home kakela o kuu aloha.
O oe a owau kau i ka hano,
Me na lei eiwa a kaua;
Ua hele mai nei loko a liua,
A poluluhi au i ko aloha.
Kuu hoa i ke one o ke awaiki,
A he iki ko aloha eha nei kino;
O oe kuu lei i lei a lei,
I lei rose na’u no ka ua naulu.
Uilani na hana a kuu aloha,
I ka moe hooipo me Niolopua;
Hea aku no au o mai oe,
Ekolu no pua lawa kuu lei.
Haina ka puana no kuu aloha,
He hapa Hawaii hapa Niihau;
Haina ka puana no kuu inoa,
Milimili na ka la welo i Lehua;
Haina ia mai ana ka puana,
Kuu home kamalino i ka ehukai.

(Kuokoa, 10/3/1919, p. 8)

KUU PILI I KA UA NAULU.

Ka Nupepa Kuokoa, Buke LVII, Helu 40, Aoao 8. Okatoba 3, 1919.

Another mele composed by S. M. and Pansy, 1895.

HOOHENO NO KA INUWAI.

Auhea wale oe e ka Inuwai
Hoa hooipo hoi o ke kehau
Me he a la o kuu aloha kekahi
Pulu ana i ka ua Lihauanu
Ua anu hoi au a e noho nei
I mehana i ka wai wela o ke kini
Me neia oe noonoo mai
Ai hookoia ko makemake
E i ae ka makani a hiki mai
Aole hopo iho ko’u manao
Manao paa ko’u a hiki aku
A kau kaua i ka hanohano
O ke kau ae a ke ao i ka ipo lia
He halia he manao kai hiki mai
I alawa iho wau no Hulaia
Alo ana o Kalanipuu i ke kai
O ka noho nani mai a Niumalu
Hanohano i ke kai Nawiliwili
Ke hone a ke kai i ka pueone
Me he leo ala no kuu aloha

Haina ia mai ana ka puana
I mehana i ka wai o ke kini

Hakuia e,
S. M. a me Pansy.

(Leo o ka Lahui, 6/10/1895, p. 2)

HOOHENO NO KA INUWAI.

Ka Leo o ka Lahui, Buke II, Helu 1226, Aoao 2. Iune 10, 1895.