HE MELE INOA.

1. No ka lei Oliana ke aloha
Hoa hooipo o ka po ana
Anu mai ka uka i Iao
I ka noa a ka ua liilii
Pulu elo ke oho o ka palai
Koolua o Mailekaluhea
Ke hea mai nei o ka lia
E hoi maua ua lai
Ua malu ke kula i Huehue
Ke hue ae nei ke aloha
Hana uko ole i ka nui kino
Kuu kino kai alo ilalila [ilaila]
I ka leo hone a ke aloha
He aloha kai hiki mai
Paila i ka puuwai
Hookahi a’u mea uluhua
O ka waimaka e hanini nei
Kohu waipuilani la i ka lewa
Ka haule ana iho koikoi
Koikoi ka leo oia manu
I ke kalaku i ka mauna
Mai noho oe a hana mai
I ka eueu o Halerose
O Hului kuu lima akau
Pili mai hoi kuu lima hema
Kau oe i ka lio a he neo
O kau ia i lohe oe
I lohe ka lai i Wailuku
E ola ka pua i ona ia
O ka lei Oliana he inoa.

2. Auhea wale ana oe
E ka liko pua o ka hau
Hauna akamai kaiala
Ua paa pono i ka api
Kupono i kou laki
I ke kii a ka lihilihi maka
He makana nui ka ke aloha
Hiipoi na kuu kino
Kuu kino kai alo iho
I ka leo wawalo o na manu
Maua meiala kai alo
I ke kuahiwi me ke kualono
He lono kai hiki mai
Ke kaona ua haunaele
O ke ku a ke koa nui
I ka lihikai o Keawalua
Elua maua ilaila
I ka wai hui o ka mauna
Mauna kuu lei rose
I pilia me ke onaona
Haina ka puana i puka
I lohe ka lai i Wailuku
E ola ka pua i ona ia
Ea liko pua hoi o ka hau.

3. Auhea wale ana oe ke aloha
E uila nei ia loko
Mahalo aku au o ka nani
Ke kauwila o Puukapele
Ua huli au ma Pekina
Aohe lua o Leinahu
Hookahi wale no o Kamia
Poe alo anu o Himere
Ke i ae nei ka manao
Na’u oe a mau loa aku
Hookai ka hai waiwai
Kaohi ka ono i kuu puu
Haina ka puana i puka
I lohe ka lai i Wailuku
E ola ka pua i ona ia
O ke kauwila o Puukapele.

Mrs. Emalia K.

Wailuku, Iune 26, 1879.

(Ko Hawaii Pae Aina, 7/19/1879, p. 4)

Ko Hawaii Pae Aina, Buke II, Helu 29, Aoao 4. Iulai 19, 1879.