HE WEHI NO KA LAHUI.

He wehi keia no ka Lahui
No Hawaii Nui Kualinolino
O ka opuu liko o ke Kalaunu
Kiko-waena o ka Pakipika
E ala Hawaii Nui o Keawe
Ku mai o Maui Moku o Kama
Ea mai Molokai Nui a Hina
Kahela Lanai i ke a-ea
Eia Oahu Kakuhihewa
Ke haaheo nei me ka hanohano
Hanohano Kauai i ka’u ike
Pili mai o Lehua i ka mole olu
Ua olu ka nohona a o Hawaii
Nawe malie nei i ka puuwai
Ua hiki mai nei ka Hokuloa
Ka lono hauoli i Hawaii nei
Ua moe i ke kau moe hooilo
Hoohui Aina a ka lokoino
I manao ai hoi a e lima nui
I ka pono Kivila a o Hawaii
Kue ka mana o na haipule
I ka hana pakaha a na enemi
Hoi hou ke Ea o ka Aina
He wehi hanohano no ka Lahui
Umia ke aloha paa iloko
Kaohi malie i ka puuwai
O ka waiwai na ua sila ia
Ua paa loa ke Aloha Aina
Aole hoi hope na Hawaii
A kau e ka Hae o ka Lanakila
Hea aku makou i ka Lahui
Pae e ka leo ua lanakila
Haina ka pua a i lono ia
Ua ola Hawaii a mau loa

Haku ia e
Mrs. Kala.

Honuakaha, Mar. 10, 1893.

(Leo o ka Lahui, 3/15/1893, p. 3)

Ka Leo o ka Lahui, Buke II, Helu 662, Aoao 3. Maraki 15, 1893.