ROYALIST LEIALOHA WAIAU.

He uhane he aloha keia
No ke kino wailua o Leialoha
Ke uwe helu nei a o Kuikahi
Auwe kuu lei kuu minamina
Kuu hoa pili a o Healani
Hoakaana o kahi mehameha
Kuu hoa moe o ka po kane ole
Auwe ke aloha e kuu lei
Ua hala i ke ala hoi ole mai
Noho iho hoi au me ka minamina
Hoopa ae ana i ke aloha
Pehea la ia e pau ai
Pane mai Waiau me ka nahenahe
Auhea iho nei kuu lei rose
Pane ae Nohola me ka luuluu
Aia i ke ehu a ke kai
Haina ia mai ana ka puana
He uhane he aloha no Leialoha.

(Oiaio, 10/12/1894, p. 3)

Ka Oiaio, Buke VI, Helu 41, Aoao 3. Okatoba 12, 1894.