HE WEHI NO MISS. ANE BELL.

1

Hanohano Mana i ka uhiwai
Haaheo i ka liko o ka mamane
O ka noe a ka ua kikoni ili
Me he la o kuu aloha kekahi
Akahi ka manao a hoonioni
E uila ke aloha pili me au
Heaha nei hana a ka nui manu
Hauwalaau nei puni Waimea
Aohe hana a ka wai koiawe
Lana malie i ka poli o Malio
Ua like a like me ke Aniani
Ka alohi i ke alo a o Maukele
Haina ia mai ana ka puana
O Ane ka wahine nona e ka lei.

2.

E aha ia ana o Maunakea
Kuahiwi alo pu me ke kehau
Alawa iho oe o Maunaloa
Kohu moa uakea i ka malie
Ku au mahalo aku o ka nani
O ka ale a ka wai hui o ka mahu
Mahui aku au a e ike lihi
Ka uwahi noe a o Kilauea
Ea mai nei a o Halemaumau
Enaena i ke ahi a ka wahine
He wahine kui pua lei no Laa
A he hoa hooipo no ka malanai
Iahona Puna i ka hone a ke kai
O ke oho o ka hinano ka’u aloha
Haina ia mai ana ka puana
O Ane ka wahine nona ka lei.

3.

Nani wale ka uka i Lanimaomao
A oia uka noho a ke aloha
Hoolono o ka leo o ke kahuli
I ka honehone i ka lau akolea
Haihai olelo me Woka Lale
Me ka olali o na Hilana
O ka ui kaulana helu ekahi
Puuwai hao kila a e hana nei
Ui ae ka manao pehea oe
E Hiku i ka poli o Mailekini
Aia Kaala mauna iuka
Haaheo i ka uhi wai a ka noe
Ua nani Ihiihilauakea
Me ka ohai ula noho i ka lulu
Uluhua i ka pa mau a ke kiu
Ka makani haihai lau amau
Ua mau ke aloha paa i ke kino
A i hoapili no’u me ke onaona
Haina ia mai ana ka puana
A o Ane ka wahine nona ka lei.

4.

I aloha i ka ua a ka Paahoa
I ka nihi ana ae ma Lihau
Haulani i ke alo o Makaukiu
I ka lihiwai o iniki-welawela
Pehea ka noe o Waialeale
Ua kupilikii Hauailiki
Ua lei na pua i Kukaniloko
I ka hao a ke kiu waiahulu
Ua nani o Kapaa e waiho nei
Kehakeha i ka pa a ka inuwai
Waiwai hooili na’u ke aloha
A i hoa pili no Hihimanu
Haina ia mai ana ka puana
A o Ane ka wahine nona ka lei.

This mele was composed very long ago by
Mrs. Lioe Kaanaana.
Waimea, S. Kohala, Hawaii, Nov. 10, 1894.

[Almost forgot about this week’s Mele Monday post, and it is already Friday. The mele in the post is for “Ana,” and is composed by “a woman named “Liʻoe of Waimea, Hawaiʻi.” It seems like a variant of the second verse of this mele. Click here to get taken to the Bishop Museum post.]

(Oiaio, 11/16/1894, p. 2)

Ka Oiaio, Buke VI, Helu 46, Aoao 2. Novemaba 16, 1894.