A Name Song for Queen Kapiolani.

[COMPOSED BY KAMEHAOKALANI.]

1 Aia i Alakai ka anoi,
Na pua keu a ke aloha,
He aloha ka–ii–mau loa,
A no’u no ia la kekahi.

Cho:—O ia la ka pua i poni ia,
I kukuni paa ia ka iini,
He iini kau na ka manao,
No halia hana mau i ke kino.

2 Kuu kino kai lono i ka leo,
I ke kani a ka manu o uka,
Ulu mai ka manao a nui,
Hoonua i ka lau laau.

Cho:—Au mai nei holu i ka wai,
Ma ke kihi hema o ka aina,
Aneane hoolale na manu,
Na kapuai kani o Ulili.

3 Ke nu mai nei ka makani,
Ke owe mai nei ka moana,
Ane hiki mai paha o Uwila,
Ke aiwaiwa o luna.

Cho:—Nana i kaomi na manao,
Hakukoi ka wai i ka pali,
Puluelo ka liko o ka lehua,
Ua olu i ka ua ke hau.

(Koo o Hawaii, 8/29/1883, p. 8)

Ke Koo o Hawaii, Buke 1, Helu 2, Aoao 8. Augate 29, 1883.