E OLA HAWAII I KE AKUA.
Lehua e, Lehua hoi
Pehea o Kaula au i ke kai
Hookoloia a i Niihau
Ke kupua Kilioe noho i ka pali
E Hina e, e Hina hoi
Pehea na ko’a a o ka moana
Ninau ia i ka Waikea
Me ke kauila holu Puukapele
E walea ana me Nohili
Me ka lei pahapaha a o Polihale
E ola ea, e ola hoi
A e ola Hawaii a i ke Akua.
Kaala e, Kaala hoi
Pehea ka noho’na Oahu nuui
E wale ana me Waoala
Me ka uluwehiwehi a o Halemano
Leahi e, Leahi hoi
Kaimana kaulana o ka aina
Pehea hoi a o Makapuu
Ihiihilauakea kau mai iluna
A ka luna hoi o Keaniani
Maikai na hana a Olopana
E ola ea, e ola hoi
A e ola Hawaii a i ke Akua.
Piilani e, Piilani hoi
Pehea na Hono i ka malie
Ua la’i pono Kapapawai
Ua wehi i na lehua a o Lihau
Haleakala, Haleakala e
Pehea e ka wai hu’i o Kalena
Kahiko ana a i Piiholo
Me ka ua ulalena a i Awalau
Lauahi Iao ke pani wai
I ka pela kapu hoi a o Kakae
E ola ea, e ola hoi
A e ola Hawaii a i ke Akua.
Lilinoe e, Lilinoe hoi
Pehea e ka hau o Maunakea
Kuu ia mai kuu ia mai
Ko kapa hau anu a e Poliahu
Hulihee e, Hulihee hoi
Paa ia ko kapu ihi lani kapu
Ahuena e, Ahuena hoi
Pehea e ka nalu ha’i o Kamoa
Hiilawe e, Hiilawe hoi
Makaala pono ia i ka lewa nuu
E ola ea, e ola hoi
A e ola Hawaii a i ke Akua.
Iwilei, Sept. 29th, 1894.
(Leo o ka Lahui, 10/2/1894, p. 2)
Ka Leo o ka Lahui, Buke II, Helu 1040, Aoao 2. Okatoba 2, 1894.
Kūlia i ka Pūnāwai (Kumu Hula Association of Southern California) will be staging this mele in our upcoming mass concert on Feb. 15, 2015, in Mission Viejo.
…what an interesting coincidence.