He Wehi no Uluhaimalama.

Hookahi la nui ua hiki mai,
O Uluhaimalama he malapua
Ua ana pono ia na kapuai,
Ka loa a me ka laula,
Ua hoolawaia e na hoa,
E kanu a ulu, liko a lau,
Pua a mohala i ke kakahiaka,
Puia i ke ala o na pua,
Onaona mapu ana hanu o ka Panase,
Popohe a ka lihilihi veleveta,
Pehea iho oe a i ka lehua,
Na lehua makanoe o Luluupali,
Hainaia mai e ka punohu,
Ka pipio a ke anuenue iluna,
Aole i ana iho kuu makemake,
Ka popohe a ka pua Ponimoi,
Kuu pua Vaioleta poina ole,
Noho mai i ka malu hoomomoe,
Auhea la pua Ohawai,
A he pua mililani na ke aloha,
Puia onaona ka puana ia,
Uluhaimalama i ka lanakila.

(Makaainana,10/22/1894, p. 1)

Ka Makaainana, Buke II—Ano Hou, Helu 17, Aoao 1. Okatoba 22, 1894.