[The title is illegible in the digital copy. Hopefully all of the newspapers can get clearly scanned one day before it is too late.]*

1.

Hanohano Mana i ka uhiwai
Haaheo i ka liko o ka mamane
O ka noe a ka ua kikoni ili
Me he la o kuu aloha kekahi
Akahi ka manao a hoonioni
E uila ke aloha pili me au
Heaha nei hana a ka nui manu
Hauwalaau nei puni Waimea
Aohe hana a ka wai koiawe
Lana malie i ka poli o Malio
Ua like a like me ke Aniani
Ka alohi i ke alo a o Maukele
Haina ia mai ana ka puana
O Ane ka wahine no e ka lei.

2.

E aha ia ana o Maunakea
Kuahiwi alo pu me ke kehau
Alawa iho oe o Maunaloa
Kohu moa-uakea i ka malie
Ku au mahalo aku o ka nani
O ka ale a ka wai hui o ka mahu
Mahui aku au a e ike lihi
Ka uwahi noe a o Kilauea
Ea mai nei a o Halemaumau
Enaena i ke ahi a ka wahine
He wahine kui pua lei no Laa
A he hoa hooipo no ka malanai
Iahona Puna i ka hone a ke kai
O ke oho o ka hinano ka’u aloha
Haina ia mai ana ka puana
O Ane ka wahine nona ka lei.

3.

Nani wale ka uka i Lanimaomao
A oia uka noho a ke aloha
Hoolono o ka leo o ke kahuli
I ka honehone i ka lau akolea
Haihai olelo me Woka Lale
Me ka olali o na Hilana
O ka ui kaulana helu ekahi
Puuwai hao kila a e hana nei
Ui ae ka manao pehea oe
E Hiku i ka poli o Mailekini
Aia Kaala mauna iuka
Haaheo i ka uhi wai a ka noe
Ua nani Ihiihilauakea
Me ka ohai ula noho i ka lulu
Uluhua i ka pa mau a ke kiu
Ka makani haihai lau amau
Ua mau ke aloha paa i ke kino
A i hoapili no’u me ke onaona
Haina ia mai ana ka puana
A o Ane ka wahine nona ka lei.

4.

I aloha i ka ua a ka Paahoa
I ka nihi ana ae ma Lihau
Haulani i ke alo o Makaukiu
I ka lihiwai o iniki-welawela
Pehea ka noe o Waialeale
Ua kupilikii Hauailiki
Ua lai na pua i Kukaniloko
I ka hao a ke kiu waiahulu
Ua nani o Kapaa e waiho nei
Kehakeha i ka pa a ka inuwai
Waiwai hooili na’u ke aloha
A i hoa pili no Hihimanu
Haina ia mai ana ka puana
A o Ane ka wahine no ka lei.

This was composed long ago by Mrs. Lioe Kaanaana.
Waimea, S. Kohala, Hawaii, Nov. 10, 1894.

[Might anyone have more information on Mrs. Lioe Kaanaana and Ane Bell, the person who she composed the mele for?]

*Although we cannot read the title here, this article is reprinted with some alterations in Ka Oiaio, 11/16/1894, p. 2, under the title, “He Wehi no Miss Ane Bell.”

(Leo o ka Lahui, 11/14/1894, p. 2)

Ka Leo o ka Lahui, Buke II, Helu 1067, Aoao 2. Novemaba 14, 1894.