HE LEI NO KAPIOLANI

[Composed by the Kawaihau Glee Club, Kapaa, Kauai]

1

E aha ana Moikeha
I ka lihi-kai o Puna?
E ana ana i ka loa,
I ka laula o Kapaa.

Cho.—O ka pa kolonahe a ke Kiu,
Hoolale waianuhea,
Kilikilihune mai ana,
I ka liko lehua a Pane [apane].

2

Ke nu nei ka makani,
Hoolua o ka aina,
Eia iho ka mehana,
O ka poli o Hooipo.

Cho.—O ka pa kolonahe a ke Kiu, &c.

3

O ka pane leo a ka manu,
Piwai o Makaleha,
Kau hana maalea ia,
Ka mikiala i ka lehua.

Cho.—O ka pa kolonahe a ke Kiu, &c.

4

Eia la he makana,
He mohai na ke aloha,
Na’u i kanaenae,
I ka poli o Manokalani.

Cho.—O ka pa kolonahe a ke Kiu, &c.

5

Akahi a lai loko,
I ka ehu wai a ka liko,
I ka hea a ka Lawakua,
Ka makani o na pali.

Cho.—O ka pa kolonahe a ke Kiu, &c.

N. K.

[Does anyone know who N. K. is?]

(Ko Hawaii Pae Aina, 1/18/1879, p. 1)

Ko Hawaii Pae Aina, Buke II, Helu 3, Aoao 1. Ianuari 18, 1879.