He Inoa no Kaleleonalani.
1 A Waimea makou
I ka uka Waiahulu,
A ka Halauaola
Malu i ka hale lau-koa.
2 Hoonoho i Waineki
Kauhale a Limaloa,
O kahi puu hulahula
Noho ana a Emalani.
3 A Kauaikanana
Paheehee ka iho’na,
Pakikakika ka pii’na,
Ai e ana i ka loa.
4 Ku ana i ke kualono,
Puili hua ohelo,
Mea ai na ka wahine,
Alo anu o ka mauna.
5 Ka mauna o Alakai,
Oni ana Waialeale,
Ku kilakila ka ike’na,
I ka luna o Kawaikini.
6 He aloha mai na hoa,
Na hoa pukui anu,
Moe wai o Aipo,
Pulupe i ka ua noe.
7 I ka hale malu i ka ohu,
Haihai lau laau,
Ka moena o ia uka,
O ia uka ahiu.
8 I ke anu makamaka ole,
Aohe hoa olelo,
Pukui no kela,
Kulou no keia.
9 A oi hop Emalani,
Ke Kuini a’e kuahiwi,
I ka naku i ka naele,
I ka noe o Alakai.
10 A Kalehuamakanoe,
Ako ia na pua helu,
I lei hoohiehie
No Emalani he inoa.
L. Keliimoewai.
Koloa, Mar. 6, 1871.
[Another mele written for the moutain-climbing woman, Queen Emma, when she went on her huakai around Kauai in 1871.]
(Au Okoa, 3/23/1871, p. 1)
Ke Au Okoa, Buke VI, Helu 39, Aoao 1. Maraki 23, 1871.
