KE ALOHA O KAWEKIULANI.

1st. Ua puia ke kaona i ke ala
O ke onaona Rose Hawaii
O ka pua oi kela o ka nani
A ka puuwai e anoai ai.

Hui: He aloha no Kawekiulani
No ka lei a Kapili Likelike
Pua nani o Ainahau
Ka onohi momi o Hawaii.

2nd. O ka oi aku no Hawaii
Ma nei hana o ka imiloa
He loaa i ka welelau lima
I ka nanahe malie a ka leo.

3rd. Ua mohala ka lau o ka naenae
Ua oliko ke Koaie
Ua ohaoha ka Pualehua
No ka Wohi kapu o Hawaii.

Miss Kekoaohiwaikalani.
Puahaulani Hale, Mar. 25, 1893.

(Leo o ka Lahui, 4/13/1893, p. 1)

Ka Leo o ka Lahui, Buke II, Helu 682, Aoao 1. Aperila 13, 1893.