Ka Moamoa Hula

He mele he inoa no ka hui nalu
Haulani ma ke kai o Kamoamoa
Alawa ae oe ani ka makani
Moae kaulana o Kawaihoa
E aha ia ana kauaheahe
Me haaheo i ka ili o ke kai
He aloha kahi nalu o Kamoamoa
I ke ani peahi me he ipo ala
E kono mai ana lai ka manao
E pili me ke kai hoeha ili
Ilihia i ka nani ke ike aku
Na pua hiehie a Kahelelani
Lia au i ka la me ka makemake
Kahi nalu ha’i mai o ka moana
Hoohie ka manao poina ole
I ka papa hee nalu o ka muliwai
Kohu kapa ahuula no ka moana
Hooheno i ka ehuehu o ke kai
Kai no paha oe ua ike aku
Ia Lehua mokupuni i ka ehu kai
He home noho ia na ke Koolau
Poina ole ai kahi manao
Kohu lio kakele no ka moana
He pakika he pahee i ka ili kai
Ua ana ia a ili wai like
Na hana noeau a ka makua
O ka milo hae no kau aloha
Olali o ke kai hanupanupa
He manao no kou ae ike lihi
I ke kai popolo o ke ahiahi
Akahi a lana mai ka manao
E ike i ka nalu ao Ohia
Alia hoi oe e ka makemake
E uilani nei paa ole iho
Uluwehi wale ai o ka moamoa
I ka puni kanaha a na kupuna
Nana i kono mai kahi manao
Ike ia Kaleponi aina hau
Mea ole na ale ao ka moana
Ka ilio hae o ka Pakipika
Ke kiina iho ia a ke akamai
A loaa mai au pahi koe pua
Nana e noii nowelo aku
Pau pono na ale o Kamoamoa
Kilohi aku ae la o ka nani
Molina wai gula anapanapa
Hea ia ka inoa o ka hui nalu
O ka Hae Hawaii kou makia
E ola kakou a mau loa
A kau i ke ao malamalama
Haina ka puana ai lohe ia
Kahi nalu hooheno o Kamoamoa

NIIHAU.

[This was a fun random find. You never know what you will find when and where!]

(Hoku o Hawaii, 5/22/1928, p. 3)