MAHALO I KA NANI O KILAUEA.

Hanohano Kilauea,
I ke ahi a ka wahine,
Kameha’i ke nana
Na maka o ke kamahele.

Chorus.

Mahalo i ka nani,
O Halemaumau,
Me ka uwahi noe o Kilauea,
O Uwekahuna ka’u i anoi,
I ka pehia e ka ua a noe ka nahele.

Kilakila ke ku a Kamohalii [Kamohoalii],
Kapukapu i ka maka o na malihini,
I ka pii no a hoomaha i Akanikolea,
E nanea ai me na Lehua makanoe.

Ulumahiehie wale,
Ko poli e Wahinekapu,
Au e kahiko mau nei,
I ko lei anuenue.

Waianuhea i ke ala,
Ka uka i Olaa,
I ka hoonoheahea mau ia,
E ka makani Lihaupua.

Anoi wale ia uka,
I wale ia e makou,
He lei poina ole i ka manao,
Lei no na kau a kau.

HATTIE SAFFERY.

(Kuokoa, 2/13/1920, p. 2)

Ka Nupepa Kuokoa, Buke LVIII, Helu 7, Aoao 2. Feberuari 13, 1920.