Ka pua Lilia.
Auhea la hoi oe, Kela pua lilia,
Pua nani oi kelakela, Ku ha-o i ka malie,
Pua kela ma Kahikina, I mohala i ke komohana,
O ka oi o na pua, Ka’u i kui a lei,
Kuu lei hoohiehie, Kahiko i ka nui kino,
Haahea ai ka manao, Ke ike aku i ka nani,
Hemolele oia pua, O ka pula kau maka ia,
Walania ke kii onohi, Ka onohi kau o ka moe,
Nani wale no Kaala, Kela kuahiwi la-i,
A’u i mahalo ai, Kukilakila i ka noe,
Linohau i ka malie, Alokele ke ike aku,
Ke alo oia kuahiwi, I puloku i ke kehau,
Nolupe i ke onaona, Mapumapu ai ke ala,
Honi ai Kanoenoe, Ka uka o Haleauau,
U ke kupa o Halemano, Hoomau i ke onaona,
Ke ala oia pua, E kokolo wai anuhea,
Huihui i kuu manawa, Ke au nei ka manao,
Pehea o Ualamanui [Malamanui], Kuu hoa pukui anu,
A o i anu Lihue, I mahana i ka ua noe,
I ka lihi lau laau, Pua Koolau i ke kula,
Wehiwehi i ke kupukupu, Na uka o Kokoloea,
Me oe a ke aloha, Me a’u mai ka manao,
Kaua pu ilaila, “Good bye Sally dear.”
Maunakapu, Koloa, Kauai, Feb. 16, 1866.
(Au Okoa, 2/26/1866, p. 1)
Ke Au Okoa, Buke I, Helu 45, Aoao 1. Feberuari 26, 1866.
nupepa 