A beautiful Figgs composition for his brother Leleiohoku, 1872.

Kuu Lei Lilia.

Melody—Lordly! Lordly! Swell.

Oi ala kuu Lei Lilia,
O nei ano ahiahi,
He nanahe ke pili ia,
Me ka lau lahilahi.

Oia ala ka’u kaunu,
I ke kai wa malino,
He welo na ka hae kalaunu,
E kohu ai nei kino.

A he wai kapi i ka pali,
Wai kili huna a ka manu,
Na ka iwi polena i hali,
Wai laahia o ka hanu.

E ke anu koni nei,
E ka hau kololio,
Owau ka i punihei,
I ka ia la hokio.

Auhea wale ana oe,
Ke oho maiewa o ka palai,
Ua pulu i ka ua noe,
Ke luhe nei la i ka wai.

He iniki olu ka ia ‘la,
E lokuloku i ka ili,
He meheu no ka io, a mala,
Lehiwa wale hoi ke pili.

Nawai oi ala e piliwi,
He kale na ka ale loa,
He pipi kaulua na kiwi,
He uli na ka heepuloa.

E hoi no au e pili,
Me ka lai o ke kaona,
I wai kilihe i ka ili,
Ka wahine o Kaiona.

(He inoa no Leleiohoku.)  Figgs

(Au Okoa, 1/25/1872, p. 1)

Kuu Lei Lilia.

Ke Au Okoa, Buke VII, Helu 41, Aoao 1. Ianuari 25, 1872.

Sweet love song, 1886.

Uhiwai O Kaiona

Auhea wale ana oe
E ka liko pua o Maleka
Mea e ka hikina mai
Hoolau kanaka i ka puuwai

Hui—Nawai e ole ke aloha
He uhi wai no Kaiona
Ua ona ia e na manu
Iiwi maka polena.

Pehea ka hali’a mae ole
E o mai nei i ka lihilihi
Palihi wale ka anoi
E lalawe nei i kuu kino.

Kawaihonakapu.

(Nupepa Elele, 7/24/1886, p. 4)

Uhiwai O Kaiona.

Ka Nupepa Elele, Buke VIII, Helu 4, Aoao 4. Iulai 24, 1886.

A mele inoa for Kuihewa, 1914.

HE MELE INOA NO KUIHEWA

Eia Kuihewa Kalani Alii nui
Ke kuahue o Halawalawa ka Io
Ka pua kakoililani a Manuia
Ka weolani na Kukaniloko—a
Kani ku’ilua Hawea ka pahu alii
Ku’i nakolokolo o ka Aumakua
Kani oeoe kani omeku ka Iwa
O Ihukolo ke kahuna alii
Uuina nakolo nakulukulu
Kani ku’i ka hekili pamalo
Olapa e lalapa mai ka uwila
Mo ka piko o ke alii—e, Alala
He punua, he Lale manu no Kaiona
O Kuihewa Kalani a Ku—e
E noho i ka moku Oahunui
Ua—ike——a

(Holomua, 10/10/1914, p. 1)

HE MELE INOA NO KUIHEWA

Ka Holomua, Buke II, Helu 2, Aoao 1. Okatoba 10, 1914.