Another mele for Kilauea Lighthouse, 1919.

HE MELE NO KA HALE KUKUI O KILAUEA.

HALE IPUKUKUI O KILAUEA, KAUAI.

Nani wale ka uwila i Kilauea,
E anapa mai la i ka paia lani;
Hoike mai ana i kona nani,
He malamalama oi kelakela;
Helu ekahi a o Hawaii nei.
Ma ka lihi kai o ka Pakipika;
Ua ana pono ia kona enekini,
No kanaha mile kona mamao;
Kaomi lima ia iho ke pihi,
E niniu ia no umi kekona;
Hihiu na hana a ka Puakea,
He oi pakela a ke akamai;
I hana noeau ia e Palani,
Me na waihooluu like ole;
He kinohinohi ke ike aku,
Ka anapa a ka onohi kaimana,
Ua hanaia a ku i ka nani,
Molina wai gula anapanapa;
Ka papa dala ke kahua ia,
Ka hulali a ka wai hoohinuhinu;
Ua kohu lihilihi anuenue,
Ka alohi, ka anapa ke ike aku,
Haina ia mai ana ka puana,
Hale kukui nani a o Hawaii nei.

Hakuia e MRS. W. PA.

Hanalei, Kauai.

(Kuokoa, 5/2/1919, p. 3)

HE MELE NO KA HALE KUKUI O KILAUEA.

Ka Nupepa Kuokoa, Buke LVII, Helu 18, Aoao 3. Mei 2, 1919.

Advertisements

Mele for Royal Order of Kamehameha by Mrs. Pa, 1925.

HE MELE NO KA AHAHUI KAMEHAMEHA.

Hanohano e ka Hui o Kamehameha,
Lei haaheo nei i ka mokihana,
Aia i ka la’i o Ahukini,
Ua hele a piha lulu ka makani,
Kau aku i ka hope o Maunakea,
E haawi ke aloha ani hainaka,
Hilinai ae ana ma ka palekai,
E nanea malie i ka oneki,
Ulumahiehie i ka ehukai,
Me ka piha hauoli i ka puuwai,
Au aku o ke kai o Kaieie,
A hoea i ka wehi o ke kaona,
Hala ae e ka hale ipukukui,
Halekuke ka uwapo a e pili ai,
Kau aku i ka oto oni ka huila,
Aia ka ilina Iana Hokele,
Ilaila oukou ike iho ai,
I ke ala haaheo a he alaweta,
Ike aku i ka nani me ka maluhia,
Na rumi kapu o ka ona hokele,
Ua nani na hana a ka ahahui,
Ua ai a lawa me ka maemae,
Haina ka puana nona ka lei,
E ola e ka hui o Kamehameha.

Hanohano e ka Hui o Kamehameha,
Lei haaheo nei i ka mokihana,
Aia i ka la’i o ke kaona,
I ka wehi o ka Uakukalahale,
Kaapuniia a puni ke kaona,
Na kihi eha o halealii,
Leiia i ka lei o ka lanakila,
Papahi i ka lei o ka hanohano,
Hanohano na hana a ka ahahui,
A ke Kilauea e hii mai nei,
Hiiia i ke kai a o Mamala,
A Maunakea a e pailaka nei,
Ike maka i ka nani a o ka uwila,
Ka hoku hele o ka Pakipika,
Ua hanaia a ku i ka nani,
Me na waihooluu like ole,
He kinohinohi ke ike aku,
I ke aka o ka wai hoohinuhinu,
Hala ae Daimana Hila mahope,
A he nani Ihiihilauakea,
Au la oukou i ke kai loa,
Aloalo ehukai a o ka moana,
Alo ae o ka Lae o Kalaau,
Kunihi Molokai me Lanai,
Kaulana o Maui no e ka oi,
I oi wale no ia Haleakala,
Mahalo i ka nani o Kahului,
Na hoohiwahiwa a ka ahahui,
Ua lawa ka ikena e a’u lei momi,
Ua ike i na Hono a Piilani,
Heleia i ka loa me ka laula,
Ma na pali Koolau o Maui,
Mahu’i aku ana e ike lihi,
I ka wai kapu mai o Keanae,
E hoi na pua a Kamehameha,
Ke la’i mai nei malino ke kai,
Hookuku au puni Hawaii,
Kauai ka oi o na ailana,
Aina i ka nani me ka maluhia,
Lei hanohano nei i ka mokihana,
Haina ka puana nona ka lei,
E ola e ka hui o Kamehameha.

Hakuia e MRS. PA.

Ka Poli Lauae o Makana.

(Kuokoa, 10/15/1925, p. 2)

HE MELE NO KA AHAHUI KAMEHAMEHA.

Ka Nupepa Kuokoa, Buke LXIV, Helu 42, Aoao 2. Okatoba 15, 1925.