He Inoa no Kaleleonalani.
Ka uka i Kilohana ka anoi la,
Ka iini kau o ka manao la,
Ka halia i ke anu o ka uka la,
I ke ohu nee o ka mauna la,
He kapeke he pahee he pakika la,
Ke ala e hiki aku ai la,
Paa i ka lala kamahele la,
Na hinahina ku alanui la,
Ke hiki aku i Puukapele la,
I ka kauila pano ohiohi la,
Luana i Waineki ka Wahine la,
Kaleleonalani he inoa la,
Moe aku i ka hale kamala la,
Hale o ka pupu kanioe la,
He’hu wawae o Elekini la,
Kinikini na hoa Painiu la,
Ka nahele o Hauailiki la,
Ilaila o Kapukaohelo la,
He ihona Kauaikanana la,
Ikiiki ia alu kahawai la,
He ka-hana koke aku no ia la,
Heia ka mana o ka wai la,
Hailona i ke kino ohia la,
Ka piina’ku o Pakaua la,
He kaua lima ka ke aloha la,
Kualono o Kaluaokaa la,
Komo i ka nahele wehiwehi la,
I ka ulu ohia mokihana la,
Ku hao Kalehuamakanoe la,
Ponaha i ka wao laau la,
Noe wale mai no ka lehua la,
Neenee papa i ke Kohekohe la,
Ua poni ka maka o ia pua la,
Noho hiehie i ka lau laau la,
He nenelu ke ala e hiki ai la,
He ulike launa ole mai la,
Hoao i na lepo pilali la,
Kohu lepo ai o Kawainui la,
Kalalaakamanu aku ia la,
Ka ihona aku o Kawaikoi la,
Koi kua inea i ka loa la,
Aikena ua maopaopa la,
He hanahanai Halepaakai la,
He malana hinu hoi ka nahele la,
I ka naele o Alakai la,
Ka nahele o Aiponui la,
He au kika i ka Puukolea la,
Kunihi mai Aipoiki la,
Lawelawe na lima o ke anu la,
Kipu paa mai e ka noe la,
Halana wai a’e ko lalo la,
Moe ole ia po a ao la,
Na hoa i ka heu kalakala la,
Hoolale i ke ahi lala poli la,
Pulupulu i ka pua limu la,
Ua noho pohai a puni la,
Le’a ai kulou a “Emma” la,
Aia ka pono o ke ao la,
I loaa Kipapaaola la,
Ua ola i ka ohu kokua la,
Kau pono i Kaawakoo la,
Ka palena mai o Kilohana la,
Okipau ka hana a ka Wahine la,
Kau pono iho i ka wekiu la,
Ka pane poo o Maunahina la,
Ike i na pali Koolau la,
Ka waiho nani a Hanalei la,
One hanana o Mahamoku la,
Oni ana o Naue i ke kai la,
O ka wai o Lumahai la,
E huli e hoi ka Wahine la,
Ua uhi ka ohu i ka mauna la,
He aloha—la—ua lai—e. “Mi;” *
Honolulu, Feb. 9, 1871.
[A name song written for Queen Emma and her famous travels about Kauai.]
(Au Okoa, 2/16/1871, p. 1)
Ke Au Okoa, Buke VI, Helu 44, Aoao 1. Feberuari 16, 1871.
nupepa 